ٹرمپ کی نئی خارجہ پالیسی کے نتیجے میں بھارت کو نقصان کا سامنا
اسلام آباد: ایک امریکی میگزین نے اپنے تجزیے میں کہا ہے کہ صدر ٹرمپ کی نئی خارجہ پالیسی میں پاکستان کو ’’فاتح‘‘ جبکہ بھارت کو ’’نقصان اٹھانے والا‘‘ قرار دیا گیا ہے، اور یہ پالیسی پاکستان کے لیے غیر معمولی کامیابی ثابت ہوئی ہے۔ امریکی میگزین فارن پالیسی نے اپنے مضمون میں لکھا ہے کہ واشنگٹن میں توازنِ طاقت پاکستان کے حق میں منتقل ہو چکا ہے اور پاکستان نے وہ کامیابی حاصل کی ہے جو بہت سے اتحادی ممالک بھی حاصل نہ کر سکے، یعنی اعتماد اور رسائی۔ مضمون کے مطابق پاکستان ایک بار پھر امریکا کے لیے ایک قیمتی اور مؤثر شراکت دار بن کر ابھرا ہے۔ دوسری جانب امریکی میگزین دی ڈپلومیٹ میں شائع ہونے والے ایک اور مضمون میں پاکستان کو عالمی توجہ کا مرکز قرار دیا گیا ہے۔ مضمون میں کہا گیا ہے کہ سال 2025 پاکستان کے لیے اسٹریٹجک واپسی اور عسکری اعتماد کا سال ثابت ہوا ہے۔برطانوی جریدے فنانشل ٹائمز نے فیلڈ مارشل عاصم منیر کو کثیرالجہتی خارجہ پالیسی کا ماہر قرار دیا ہے۔ مضمون میں کہا گیا ہے کہ عسکری قیادت نے ریاستی سطح پر انتہاپسندی کے خلاف ایک واضح اور مضبوط پیغام دیا ہے کہ جہاد کا اعلان کرنے کا اختیار صرف ریاست کے پاس ہے۔ آرمی چیف کا یہ مؤقف انتہاپسندی کے خلاف ایک اہم سنگِ میل قرار دیا گیا ہے۔ مضمون کے مطابق صدر ٹرمپ کی نئی خارجہ پالیسی میں پاکستان کو نمایاں کامیابی کے ساتھ ’’فاتح‘‘ جبکہ بھارت کو واضح طور پر ’’نقصان اٹھانے والا‘‘ قرار دیا گیا ہے۔ واضح رہے کہ اس سے قبل بھی برطانوی جریدے فنانشل ٹائمز فیلڈ مارشل عاصم منیر کی متاثر کن شخصیت کا اعتراف کر چکا ہے اور انہیں بدلتے ہوئے عالمی نظام میں ایک مؤثر اور اسٹریٹجک قائد قرار دیا تھا۔
What's Your Reaction?
Like
0
Dislike
0
Love
0
Funny
0
Angry
0
Sad
0
Wow
0
