کراچی کنگز اور لاہور قلندرز کا میچ بارش کے باعث روک دیا گیا

بارش کے باعث میچ رکنے سے قبل لاہورقلندرز نے 7.5 اوور کے کھیل میں ایک وکٹ پر 90 رنز بنا رکھے ہیں، محمد نعیم 29 گیندوں پر جارحانہ 65 رنز بناکر آؤٹ ہوئے، فخر زمان 21 اور عبداللہ شفیق بغیر کوئی رن بنائے کریز پر موجود ہیں۔ کراچی کنگز کے بولر عامر جمال نے لاہور قلندرز کی واحد وکٹ حاصل کی، عرفان نے ان کی بال پر کیچ لے کر نعیم کی جاحانہ اننگز کا خاتمہ کیا۔ اس سے قبل پی ایس ایل 10 کے چوبیسویں میچ میں کراچی کنگز نے لاہور قلندرز کے خلاف ٹاس جیت کر فیلڈنگ کرنے کا فیصلہ کیا ہے۔ ٹاس جیتنے کے بعد گفتگو کرتے ہوئے کراچی کنگز کے کپتان ڈیوڈ وارنر نے بتایا کہ فاسٹ بولر حسن علی اور بیٹر سعد بیگ کی ٹیم میں واپسی ہوئی ہے، کوشش کریں گے کہ لاہور قلندرز کو 160 سے 170 رنز تک محدود رکھیں۔ کراچی کنگز کے کپتان ڈیوڈ وارنر نے کہا کہ لاہور میں تیسرا میچ کھیل رہے ہیں، کنڈیشن سمجھ گئے ہیں، عمیر بن یوسف اور فواد علی پلیئنگ الیون کا حصہ نہیں ہیں۔ لاہور قلندرز کے کپتان شاہین شاہ آفریدی کا کہنا تھا کہ اگر ہم ٹاس جیتتے تو ہم پہلے بیٹنگ ہی کرتے، کوشش کریں گے 170 سے 180 رنز بنائیں۔ شاہین آفریدی نے کہا کہ مجھے لگ رہا ہے دوسری اننگز میں بیٹنگ مشکل ہوگی، اسپنرز کو مدد ملے گی، اس لیے رشاد حسین کو ٹیم کا حصہ بنایا۔